Nei, i wirde dasmau nid über längwiligi Wucheändi jammere, sondern meh mau chli verzeue, wies unger der Wuche eigentlech so louft.
I bi ja bi Metro Kids Africa und einigi vo euch verbinde Metro vermuetlech mit Brooklyn, New York. Und das isch gar nid so dernäbe, mir mache nämlech ziemlech bis ganz genau ds gliche wie die dert äne. Tatsächlech überchömemer de Programm füre Sidewalk vo Metro World Child.
Aber was heisst de das genau? Die typischi Wuche gseht so us: Am Mäntig si nume die Wiise im Büro, warum erkläri grad. Das heisst, d Janet und der James, ds Leiterehepaar, mache viel Administration, Buechhaltig und so. Da sie hei gmerkt, dass ig nid so ungschickt im Umgang mit Computer bi, bini vor allem so beschäftiget. Videoclips zämestelle, chlineri Sache süsch gstalte, Brichte ufd Website tue oder süsch grad ungerstütze, wo öpper es Problem mit sire Maschine hett. Das geit när eigentlech jede Vormittag so.
Am Namitag gömer de id Townships. Entwäder Lüt ga bsueche, Essenspäckli, Briefe und Gschänk vode Brieffründe verteile und die entsprächende Antworte isammle. Das heisst de o immer chli 'socialize', wie geits und bla bla bla... Oder de heimer äbe Sidewalk Sunday School nachder Schuel. Mir fahre irgendwo ufne Platz und mache Sunntigsschuel mit Lieder, Spieli, Gschänkli, Bibelstund, Input und ere Gschicht.
Dir chöitnech vorsteue, mit 150-500 Chind, je nach Quartier, cha das es rächts Fescht gäh und zu Spitzezyte heigesi 1500 Chind pro Platz! U glich, währendem 'ärnschte' Teil hockesi aui schön ufrächt da, si still und lose zue, em Ballontrick sei dank;-)
Rund einisch pro Wuche chöimer ine Schuel, womer fürne haub Stund d Ching überchöme und e reduzierte Sidewalk dörfe mache. Und am Samschtig mache die schwarze Mitarbeiter i ihrne Heimquartier ono mau Sidewalk, das isch der Grund, warum sie am Mäntig när frei hei.
Wenni schriebe, dass mir Sidewalk mache, de isch das nume haub richtig. I jedem Quartier hetts e Gruppe vo Jugentleche, wo eigentlech der Lade schmeisst. Afangs Wuche mache die e Höck, wone d Mitarbeiter d Unterlage bringe und erkläre, um was dasses dasmau geit. Und währendem Programm sälber si sie när ar Front, erkläre die Spieli, mache der Input oder verzeue d Gschicht.
D Mitarbeiter oder ig springe theoretisch nume i Usnahmefäll i, je nach Quartier gits aber meh oder weniger Usnahme:-) Es isch auso no es speziells Gfüehl, e Input ire Frömdsprach zmache und glich no ine angeri Frömdsprach übersetzt zwärde!
Voilà, Dir gseht, nach so viel Lüt unger der Wuche isches mängisch ganz agnähm, am Wucheänd nid ono immer vou Programm zha;-)