Sit längerem simer scho ufder berüehmt-berüchtige siebte Strass, der Carretera Austral, ungerwägs. Der Reisefüehrer isch chli unklar gsi, ufder einte Site hetter sehr idringlech gwarnt, gländegängigs Outo, Ersatzreife, immer schön volltanke, de Laschtwage us wäg, gnue Bargäld mitnäh und so weiter. Angerersits steit o, die meischte Teile sige befeschtigti Strass. Mir heinis ufgmacht, das Rätsel zlöse.

Grüen und Wasser si nach wie vor die dominierende Landschaftskomponänte, das isch immer no sehr schön und hett zu verschiedene Wanderige und Spaziergäng gführt. Derbi hanimi doch tatsächlech o mau no vom Räge lah überrasche, da hätti würklech grad nid dermit grächnet und ha de prompt o mini Schueh dusse lah si...

Natürlech simer uf viel Wasserfäll troffe, das isch o nüt Neus und o nid würklech überraschend. Und nach wie vor sehr schön.

Ide bekanntere Tourischte-Örtli si de o d Wildtier nüm so wild und de chas passiere, dass bim zMittag e Fuchs rächt nöch und unverschämt ume Picnic-Tisch striicht... Eifach lah fötele hettersech nid so gärn :-)

Am Wasser chame nid nume zueluege, wiesechs über d Felse stürzt, mi cha da o voll derbi si. Heimer gmacht und erwartet Nami mit chli Aare-böötle isch zumne sprützig-nasse Abentüür worde!

Je wyter nördlech dassme fahrt, desto besser isch grundsätzlech der Zuestand voder Strass. Grundsätzlech, wiu mir üs doch scho ufne guet asphaltierti Outobahn hei igstellt gha bi eim vode letschte Stück und de glich vore Schotterpischte si überrascht worde. Sehr schön und stimmigsvoll, eifach d Durchschnittsgschwindigkeits halbiertsech und die einzigi Fähre am Tag wartet haut o nid...

Ke Witz und i hätts o nid grad erwartet, aber es isch tatsächlech am Summer wärde! Je wyter nördlecher dasses geit, desto weniger garschtig wird ds Klima, mittlerwile isches scho agnähm, o gäge Abe no im Tshirt umezloufe! Überhoupt chönnt ds Titelbild o usder Schwyz si, ds Aaretal, d Voralpe und derhinger d Schneebärge, das isch doch es üs vertrouts Bild!

O hie machemer immer wieder chürzeri und längeri Abstächer vor Strass wäg, mängisch verbunde mitere Übernachtig. U de gitses de, dassme düre Wald louft, Wald, wo de nid usder Forschtwirtschaft chunnt sondern dütlech meh Ähnlechkeite mit Rägewald hett. Herrlech wild und struppig, mit Moos-bewachsene Böim und schier undurchdringlech.

Und de landetme de plötzlech wieder amne schöne Fläckli, es hett zum Bispiel hie uuuh viel Wasserfäll, wosech über d Felse stürze und zum Teil sisi beidruckend höch! Und das ganze isch immer umgäh vo, äbe, Wald, i de verschiedenschte Grüen-Tön.

Nach wie vor si o d Bärge nid wyt wäg und das o mängisch mit Gletscher. O hie donnerets hin und wieder, es isch eifach so säute und so wyt wäg, dassi nie e Abbruch oder so hätt gseh. Was fallt süsch no uf, uf däm Bild? Natürlech, Wasserfäll und Wald, wie hätts o angersch chönne si:-)

Weme de ono chli wyter ufe geit, de schafftmes de sogar bis ganz id Bärge. Das Seeli hett ds idrücklechschte Blau, woni je bimne See ha gseh und natürlech wirdi mitem Föteli däm überhoupt nid grächt, da müesstder scho säuber verbi cho! Mir hei gwüsst, dasses e See müesst ha, mi hett aber lang gar nüt gseh oder chönne erahne und mir hei scho dänkt de chönnt uströchnet si, när stiegemer so übernes Grätli und stöh vor dere Gletscher-Fels-Wand mitem Wasser ungerdranne, scho fasch chli atemberoubend!

O we d Luft wärmer wird, d Wasser si immer no chüehl bis bitterchalt, aber nach wie vor muy hermoso!

Eini vode Landschafte, womer in Patagonie o öppe die aträffe, si so wunderschöni, breiti Flusstäler, mit Flüss, wosech ire Wäg säuber bahne, nid gstüüret und scho gar nid begradiget. Da hie im Süde d Strasse chli dünn gsähit si, die chilenischi Site sogar gar keni hett, hett das für üs e churze Abstächer uf Argentinie bedütet.

De Masse vode Tourischte folgend, oder besser gseit einisch meh wieder chli vorewäg gehend, hetts üs zu däm grossartige Gletscher verschlage. Dä Iis-Wall isch bis zu 60m höch und es isch eine vode wenige Gletscher hie, wo am wachse isch. Und dasses läbt ghörtme und gsehtme immer wieder! Es donneret und grollet und wed de gnäuer häre luegsch, de sis so es paar Iisbröckeli, wo i See gheie, mitme Mords-Lärm! Mängisch sis o grösseri Bitze, ganzi Flächine, oder toucht plötzlech e Huus-grosse Iisbärg usem Wasser uf, es idrücklechs Spektakel.

Mir si o viel gloffe, mi cha hie ganz viel Wanderige im Vorgebirge mache, chunnmet de immer wieder a Seeli verbi, düre Bärgwald, hett Usblick uf Gletscher und gseht die verschiedenschte Wahrzeiche vode entsprächende Ortschafte us aune mügleche Richtige. Wär kennt das da hie und weiss, wos isch?

So viel Bewegig förderet natürlech o der Appetit und da die argentinischi Chuchi viel-grüehmt isch heimer das o usgibig usprobiert, sigs uswärts oder o bi üs ufem Grill. Ir Schwyz isch gloub mittlerwile eher Güetzi-und-Glüehwy-Saison i schätze d Bier-und-BBQ-Zyt hie aber ono grad:-)

Usserhalb vode Bärge isch de d Strass aber über hunderti vo Kilometer eher so. Relativ flach, Steppe, chume Verchehr und sälte mal e Siedlig irgendwo im nüt. Faszinierend, i versuechemer mängisch vorzstelle, wie ds Läbe hie chönnt si, itz so als Tourischt isches o es bitzli eitönig.
Der Abstächer nach Oschte hett üs viel abwächsligsriichi Landschafte gäh, viel Aktiviät und viel Ässe, mir hetts sehr guet gfalle und einisch meh hani no nid alles gseh, nos vemos!

Die Türm, womer als nächschts hei wöue bsueche, si ziemlech beliebt und so simer zur Abwächslig mau wieder chli unger d Lüt cho. Ufder Fähri hettme mir gseit, dass d Internet-Föteli vo dene Bärge nid würklech der Realität entspräche, das hie sig immerhin Patagonie und dassme würklech e wolkelose Tag mit beschter Sicht verwütschi sig nahezue unmüglech... Und sie hei Rächt gha, ds ganze Massiv hani nie gseh, u drum verzichti hie o uf das berüehmte Bild, e churzi Internet-Suechi bringtnech e viel besseri Variante dervo:-)

Näbscht angerne Outdoor-Aktivitäte geitme hie vor allem ga wandere, der Klassiker isch e W-Wäg, womer aber us Protescht gäge Masse-Tourismus äxtra nid hei gmacht:-) U glich gits u schöni Täler zum durchloufe, d Schneebärge immer chli im Hintergrund und so subers Wasser, dasses allgemein bekannt isch, dassme das diräkt usde Bäch cha trinke.

Aber nid nume bärgwärts isches e Gnuss, es hett o ufdi angeri Site e herrlechi Landschaft mit Hügle und See, d Wanderige hei chli weniger Höhemeter und chli grösseri Chance ufe Puma, aber das isch wieder nüt worde. Guanacos hättis nämlech o hie gnue.

Ufem Wäg zu däm Wasserfall warnesi usdrücklech und mehrmals vorem starche Wind. Ufgrund vor Geographie hetts a dere Stell eigentlech immer starchi Fallwinde. Zum Ussichtspunkt häre muessmesech da derdür kämpfe, bire Böe chas auso sehr guet si, dassd nomau es paar Meter zrügg geisch ga Alouf hole, ufder Plattform sälber isch still stah e zimlechi Useforderig und ufem Rückwäg chaschdi so richtig lah mittrage, es geit de fasch vo säuber!

Genau dä Wind hett de vornes paarne Jahr o derzue gfüehrt, dass es azündets WC-Papier a grossi Flächi vom Wald hett lah abbrönne. D Spure gsehtme nach wie vor sehr guet und es göngi über hundert Jahr, bissech der Wald wieder erholt heigi... I hamer nume vorgstellt, wie ig mi würd füehle, we das mis Papierli und mini Unachtsamkeit oder Dummheit wär...

Einisch meh hettsechs glohnt, am Morge chli ender ufzstah und so de grosse Mönschemasse chli bevorzcho, d Landschaft isches nämlech sehr wärt, chli Zyt zverbringe, zgniesse und zstuune, maravilloso!

E chline Umwäg, einisch meh wäg vor asphaltierte Strass, hett üs zumne wytere Nationalpark gführt. D Gägend isch vulkanischem Ursprung, mir heinis chli Zyt gnoh und hei das ganze z Fuess erkundet. Mir hei Kratere gseh und Felsformatione, wo sehr griffig wäre gsi zum chlättere. Viellech eifach chli scharf-kantig...

Der letscht Usbruch sigi muetmasslech es paar tuusig Jahr här, irgendwie hettsmi aber dünkt, es sigi no nid auzu lang här... Ganzi Landstriche si voll schwarzem Vulkan-Gstei und erstarrter Lava, mängisch gsehts us, als hättme da grad e Strass ufgrisse. Und zwüsche all däm schwarze o immer mal wieder chli farbigi Blüemli, fasch chli wiene Hoffnigsschimmer. :-)

E chli zu mire Überraschig heimer o ganz viel Tier gseh, näbe Gürteltier, Flammingos, Struusse, Stinktier und jehnschte Vögel o gfüehlti Millione Guanacos, ds vierte Kameloid, womer no hett gfählt. Luschtigerwiis kümmeresech die überhoupt nid um die viele Züün sondern hüpfe eifach elegant drüber. Und chöi e riese Krach mache, wesi um Revier oder Wiibli kämpfe.

Wasi hingäge einisch meh nid ha gseh, isch der Puma gsi. Dä Donner isch offesichtlech entwäder sehr schüch, sehr gschickt oder vermuetlech beides. Müglecherwis si das d Überräschte vo sim zNacht, das trifftme de hingäge hüfig a.

Gwüssi Tier si rächti Poser! Sigs itz es Guanaco, wosech ufme Hügel wunderschön gäge Horizont abzeichnet, oder äbe sones Häsli, wos o immer mal wieder hett. Mängisch sisi o gar nid schüüch und löh eim bis ufnes paar Meter lah häre cho.

Wiume im Park nid darf campiere, heimer das grad vorder Barriere chönne, es isch e stürmischi Nacht worde mit es paar bange Momänte, vorallem wägem Zält, aber schlussäntlech hettsech mir mau wieder zeigt, dass der chürzischt Wäg nid nume nid immer der schnällscht sondern no viel weniger immer der schönscht muess si, estoy sorprendido :-)

Mi hett üs gwarnt, i has nid so rächt ärnscht gno und has när säuber gmerkt. Der biissig chaut Wind hettmi so richtig zermürbd, irgendwenn am Abe, wed zwar amne schöne Plätzli bisch und d Sunne langsam unger geit aber es ziehtder die ganz Zyt ids Gsicht, da hesch när eifach mau gnue...

Genau, nachder Fähri isch vorder Fähri, die da hie hettis uf Feuerland, e Insle, wo vorauem, wie ufem Titelbild, us riesige Äbenine, es paar Hügle, vielne Züün und e Huufe Schaf besteit. Wie mängs fingeter ufem Föteli?

Luschtigerwis hetts o hie e Pinguin-Kolonie, dasmau sis Könige, si wärde auso immer grösser und gliche o geng wie meh em Pingu. Wesi loufe gsehts aube chli us, aus hättesi e stiifi Hüft, aber offebar isch ihres Gewatschel sehr Energie-effiziänt. U härzig fingi vorauem o d Teenies, die bruune, flauschige Chnöueli, wo da so Gägend umestöh.

Imne verlassne Wiler heimer Schutz vorem Wind gsuecht und gfunde. Auerdings isches die bis anhin chältischti Nacht gsi mit Bodefroscht und irgendwie hei d Füess eifach nid so rächt wöue warm wärde im Schlafsack. Nach wie vor bini auso unschlüssig was besser, oder schlimmer, isch, wes zieht oder gfriert... :-)

Und zu mire grosse Überraschig simer när plötzlech am Atlantik gsi! Amne wunderschöne Strand mit Klippe und Ussicht uf Ölbohrinsle. I ha irgendwie grad nid dermit grächnet, dassme hie der Boge so schnäll cha mache und bi no völlig uf pazifischi Site igstellt gsi, aber ja, hie isch das aues sehr nöch zäme. Viel andersch isches nid, eher früsch zum bade, und mi muess guet luege, dass die kommendi Fluet eim d Chleider und so nid wägschwemmt... :-)

I has würklech spannend gfunde, wiemer der Wind hett zschaffe gmacht und wieni ha agfange zluege, wieni däm cha uswiiche! Dermit hani mi südlechscht Punkt erreicht und es geit wieder ufe Richtig Bärge, que hermoso!

Der Wäg uf Patagonie isch wyt, sehr wyt und würklech sone super Strass dert abe gits o nid, schlussäntlech heimer entschiede, die 2000km nid zfahre, sondern mitere Fähri zmache. Im Büro vor Fährgsellschaft heisi zersch grad chli stöber gluegt, aber schlussäntlech hetts de tiptop klappet und mir hei üsi Tickets gha.

Irgendwie hani de aber der Idruck gha, es sigi eher e Usnahm, dass d Tourischte ihres eigete Outo mitbringe, bismers de tatsächlech ufds Schiff hei gschafft und die Ussicht ufe Laderuum hei gha, hetts doch sini Zyt brucht, vor Kontrolle vom Outo, bis vords Schiff und de schlussäntlech ads richtigi Plätzli, überall isches chlines Sueche und vorallem es Warte gsi.

Ide FAQ vor Fähri isch mehrmals explizit gstande, dasses ke Chrützfahrt isch. I ha die billigischti Kategorie buechet gha und glich irgendwie nid erwartet, dass mis Bett ufem Gang zum WC isch... :-) Es isch de aber erstundlech guet gange, i ha super gschlafe, nid zletscht wägem guete Vorhang, wo o es bitzli Privatsphäre hett gäh, fasch chlines eigets Zimmer. So hett ds Liecht die ganz Nacht chönne brönne und mit eigentlech enang o nid gstört.

Bi schönem Wätter isches u schön und warm gsi, mi hett chönne sünnele oder eifach die wunderschöni Fjordlandschaft gniesse. Bi weniger schönem Wätter, wos mehrheitlech isch gsi, hetts gschiffet und mitme starche Wind isches ziemlech chalt und ungmüetlech gsi. Ei Passage heimer übere offnig Ozean gha, dämentsprächend höch isch der Wällegang gsi und es hett einigi gäh, wo der Mage nid mitgspielt hett, und wo das überus feine Ässe nomau studiert hei.

Es paar Mau isches aber o sehr äng worde, zwüsche dene Bärge hett das ganz e spektakuläri Fahrt gah und i bi viel eifach dusse gstande und ha gluegt und gstuunet. U grad o ds weniger schöne Wätter hett si Teil derzue bitreit, mit Näbelschwade, Wolkeformatione oder Rägeböge.

Insgesamt heimer chli Zyt, Närve und e Huufe Maut gspart, es hettis e neui Perspektive uf die Landschaft und es bsunders Erläbnis ermüglechet, es isch glich rächt tüür gsi und mir chöi itz die 2000km wieder ufe fahre, vamos!

Die Insle isch gross, mit weni Strasse und für rächt vieles bekannt. Unger angerem für die Pfahlboute. Mir heinis entschide, grad es paar Täg hie zverbringe und i bereues auso gar nid! Schöni Stränd, viel Wald oder o versteckti Flüssli und Seeli hei der Ufenthalt sehr agnähm gmacht.

E witeri Bekanntheit si die viele, viele Holz-Chilchene, fasch aui glich oder sehr ähndlech ufbout und ide schönschte Farbe:-) Me gsehtse i chlinere und grössere Orte, es paari dervo ghöre sogar zum UNESCO-Wältkultur-Erbi.

O ganz bekannt isch d Pinguin-Kolonie ufere Insel-Gruppe e churzi Bootsfahrt vorder Küschte. I finges eifach härzig, wie die chline Tierli über die felsige Klippene watschle und o immer mau wieder usrütsche. O hie hetts o wieder ungloublech viel verschiedeni Vögel, überhoupt isch ds Setting sehr verglichbar mitde Insle in Peru... E churze Momänt hani de no gmeint, i heig e Walfisch gseh, das hettsech de aber als Felse usegstellt...

Viel Zyt heimer imne Nationalpark verbracht. Es hett einigi Spazierwägli gha, dür wunderbar farbigi Waldlandschafte, Buschland und o Düne bis ane grosse Strand. I ha einiges überd Vegetation im Übergang vor Düne zum Wald glehrt. Trotz der Vorsaison hetts erstundlech viel Lüt gha, i ha scho lang nüm soviel Tourischte uf eim Huufe gseh:-)

E Tageswanderig hett üs de übere Strand und einigi Hügeli i die wunderschöni abglägni Bucht bracht. Ds Wätter hett super mitgspielt, nachme chalte, nasse und graue Rägetag heimer e strahlend schöne Sunnetag gha! Und när so chönne am Strand liege, der Brandig zuelose und chli döse oder über abentürlech morschi Brüggene d Umgäbig erkunde isch eifach fasch chli wie Ferie... Der Rückmarsch isch due bis am Schluss no bau chli läng worde und i bi sehr froh gsi, womer d Zält wieder hei erreicht gha.

Einigi Bekanntheite vor Insle hani dörfe entdecke, angers fählt no, offebar machesi no sone art Pachamanca mit Meeresfrüecht, que rico!

Mini erschti Wuche in Chile isch prägt gsi vo Veränderig, uf verschiedenschte Äbenine :-) E dütleche Wächsel hetts vor allem o grad ir Landschaft gäh, ufder länge, schnälle Reis usem Norde öppi id Mitti ischmer das sehr starch ufgfalle. Der Afang isch ono prägt gsi vo schöne Küschtegägende, scho nume das e Kontrascht zude bärgige Hochplateaus vo Bolivie.

Agfange hetts mit karge trochene Wüeschtetäler. Wobi, die Iheimisches heis gschafft, immer wiederanzi Landstriche zbewässere für ihre Plantage, unger angerem Trube für Wyy und feine Pisco. So hetts de überall chli grüeni Viereggli ufde Talböde, das gseht u luschtig us und isch beidruckend.

U je wyter im Süde, desto langsam grüener wirds und d Vegetation wachst. Zersch sis nume so Büsch und Gstrüpp ufde Weide, när wirds geng wie meh chli zude Jura-Höchine, mit Chüeh, Rösser, Schaf, Giesse, hie u da es Alpaca, eifach dass im Hingergrund geng öppe ds Meer isch :-) Es isch vorallem hügelig u nüm bärgig.

Und de ischme plötzlech im Wald, mit auem, wo derzue ghört. Das isch ufder einte Site viel Forschtwirtschaft, ganzi Waldbitze si grodet, oder früsch ufgforschtet und streckewiis si u henne viel Laschtezüg voll belade mit Holz ufde Strasse. Das cha de im änge Uf und Ab zwüsche dene Hügle o zum Geduldsspieli wärde. Angerersits gits o die wunderschöne Naturpärk mitde fasch unberüehrte Wälder. Und o hie chöi die weniger pflegte Strasse je nach Outo zure Useforderig wärde...

Zum Schluss landetme de zwüschede Seee, wius mittlerwile o hett agfange rägne und immer mau wieder tuet, si die nid nume bis zum Rand oder drüber gfüllt, die ganzi Gägend isch u schön grüen. Die nach wie vor eher künschtlech schöne Vulkän, wo d Gränze zu Argentine säume hei schnee- oder iisbedeckti Spitzli und das rundet d Landschaft tiptop ab.

Es isch grüen und füecht worde, und o es ganzes Stück chüehler, d Reis richtig Süde geit wyter, adelante!

Vode letschte paar Täg hani so viel Bilder u Gschichte, dasses für füf Posts würd länge, i mache itz glich nume eine, so hani de ono chli öppis zverzelle, weni hei chume :-)

I ha mi Gränzübertritt nach Chile ire sehr abwächsligsriiche und wunderschöne Gägend chönne gstalte. Agfange hetts allerdings chli eitönig, nämlech wyys...

Bevors aber sowyt isch gsi, heimer e Zugfriedhof bsuecht, würklech eifach es Fäld, wosi die aute Dampflokine hei häregstellt, das usgschlachtet, wome no hett wöue bruuche und de när langsam vor sich häre lah roschte... Mittlerwile isches e Abentüürspielplatz für grossi Meitli und Buebe, mi cha uf dene Dinger umechlättere, umeturne, sech verstecke oder e coole Insta/Snap-Shot probiere zschiesse.

U när hetts agfange, obe tiefblau der Himmel und unger blanks wysses Salz, mit schöne Strukture. I has sehr idrücklech gfunde, so chönne id Wyti zluege und würklech eifach nume wyss zgseh, i aui Richtige. Mir si druffe gfahre, hei druffe gässe, nomeh cooli Insta/Snap-Shots gmacht, Apéro gnoh, der Sunneungergange bewunderet, nis gfragt, wie dassme sech da nid verfahrt, und eifach immer wieder gstuunet, was d Natur für Farbe cha zeige.

Und natürlech heimer o dervo gässe, nie isches eifacher gsi, ds Ässe nachezsalze, Du heschdi eifach müesse bücke und chli vom Bode abbräche, ärnschthaft:-) Die Iheimische tüe das Ganze o chli professioneller, komerzieller mache, d Siedlige am Rand vor Wüeschti tüe das Salz gwinne, ufbereite und när in ganz Bolivie verchoufe.

Und, quasi als Farbtupfer, hetts wie Inseli ir Wüeschti. Der eint so Hügel isch über und über mit Kaktee bewachse, riesegross und sehr idrücklech. Einisch meh simer hie ufde Spure vode Incas gsi, scho die hei dä Ort als Kultstätte brucht. Nimmtsnech Wunder? Tja, hasta luego...

Es isch de när sehr farbig wytergange, mit Koralle, Bärge, Lagunene und Quellene, Sunneuf- und -untergäng, i aune Farbe und wunderschön!

Wo d Spanier dä Bärg hie entdeckt hei, ischer no rund 400 Meter höcher gsi. Mittlerwile gits rund 180 Löcher, es wahrs Labyrinth und sehr viel weniger Silber als no vor 400 Jahr. Am Fuess vom Bärg isch es sehr härzigs kolonial-Stil-Städtli mit schöne Plätz, beidruckende Chilchene und offizielle Gebäude und änge Gässli voller Märit. Bsungers bim Idunkle lohntsechs sehr rings ume Haupt-Platz no chli ungerwägs zsi.

Der Grund für d Bedütig und überhoupt für die Stadt isch aber scho, dasses früecher sehr viel, äbe, Silber und hüt no ganz e Huufe angeri Mineralie zfinde git. Zum Teil si d Mine no die gliche, wo d Spanier hei gmacht, und es isch rächt so, wieni mir das ha vorgstellt, wie dassme FRÜECHER hett Bärgbau gmacht, zum Bispiel ide Schiefermine... Aber es isch tatsächlech immer no so... Viel Handarbeit, Tunnle, wo meh oder weniger vertrouenswürdig abgsicheret si, immerhin offiziell nüm Sklavearbeit.

Offiziell, wiu d Mineros schaffe eigentlech "sälbständig" wärde nach Qualität und Quantität zahlt und si vor allem vorde Gfahre nid würklech gschützt, einigi verzichte sogar ufne Atemschutzmaske, derbi isches ungloublech stoubig. Normalerwiis stärbesi o are Lungefibrose nach rund 20 Jahr.

Üse Füehrer isch sälber Minero und das hani sehr gschätzt. So heimer us erschter Hand über ds Läbe und Dänke vo dene Lüt chönne lehre. Und i ha der Idruck gha, dasser so ono guete Draht zude Lüt am Bärg hett gah. Mi cha de Mineros "Trinkgäld" gäh, Sache, womer vorhär zäme ufem Märit hei gchouft, Softdrinks, Coca-Blätter, Händsche und Sprängstoff (är hettis explizit abgrate, Zigarette und Alkohol zchoufe, obwohl das sehr begehrt sigi...)

Nachem Bärg geits de wyter, d Mineralie wärde usem Erz useglöst, früecher wie hüt mit giftiger Chemie. D Spanier hei früecher grad diräkt hie Münze für die ganzi Wält prägt. U o hie isch d Sklaverei wytergange. Nachdämsi hei gmerkt, dass d Afrikaner mitder Höchi nid zschlag chöme und sehr schnäll stärbe, heissi die i Dschungel gschickt und die Iheimische usbütet. Ide Schmelzöfe hettme d Quäcksilberräschte verdampfet, und die Dämpf hei d Arbeiter i drü Mönet lah erblindet und de tötet.

Es isch es sehr zwiespältigs Erläbnis gsi. Quasi usder sichere Distanz ds Eländ im Bärg ds beobachte und glichzytig sehr viel zlehre und mitzübercho. I gloube, i de letschte 400 Jahr hettsech d Art vor Sklaverei eifach chli veränderet, en serio!

I ha ds Glück und d Chance gha, e Wuche bire Familie dörfe ds sii. Das hett scho grad dermit agfange, dassi am erschte Tag mit ufds Schuelfescht bi, wo d SuS verschiedeni Tänz us ganz Latinamerika ha ufgfüehrt. Das isch sehr härzig gsi bide Erstklässler, bis zu scho fasch ärnschthaft bide Schuelabgänger. Bsunders schön gfunde hani, dass d Abschlussklass mit ihrne Eltere hett tanzet.

Schutte isch wichtig hie in Bolivie, bösi Zunge säge, der Präsident boui meh Schuttplätz als Spitäler, uf jedefall hett auso o e Mätch nid dörfe fähle. Mini Gascht-Mamá isch oscho ir Schwyz gsi und hett unger angerem bemänglet, dass Schutte bi üs e chli emotionslos sig...:-) I ha nid soo viel Stadionerfahrig und ha de nid so guet chönne entgägeha, idr Zytig si ja öppedie Hooligans im Vordergrund und das hani nid unbedingt aus Pluspunk wöue ids Fäld füehre. Uf jede Fall hei hie d Hardcore-Fans 90 Minute lang gsunge und mitde Arme gwunke, das hettmi beidruckt. Und mir hei gwunne!:-)

O die Stadt hett e Christo, sogar es paar Centimeter grösser als dä in Rio. Är steit ufme Hügel ir Stadt und mi cha useläse, öbme wott ufeloufe, oder es Gondelbähndli (genau, schwyzer Härsteller) wott näh. Überall wird eim abgrate ufezloufe, mi wärdi ziemlech sicher usgroubt, vorallem als Gringo und d Mamá isch also tatsächlech oscho überfalle worde, als Iheimischi i Begleitig vomne Gascht! Drum simer nid gloffe. Inne ir Statue hetts e Stäge, so dassme sogar chli cha ufestiege und aui schwarze Pünktli si Gucklöcher, sehr luschtig.

I bi de o chli sälber ungerwägs gsi und dank em Insider-Wüsse vor Familie, meischtens absits vode grosse Tourischte-Pfäd. Das hani u schön und spannend gfunde, guet gfüllti Taxis, wo ersch abfahre, we o der hingerletscht Platz bsetzt isch, viel Märite, wunderbar farbig und lut, und neugierigi Blicke. Einisch meh hani d Plätz ir Stadt sehr cool gfunde, es si gloub würklech Träffpünkt fürd Lüt!

Sogar i Usgang simer, es git so Beize mit Livemusig, aber mi muess wie häre ga luege, bevorme weiss, öbsechs lohnt. Mir hei Glück gha und eine vode beschte Mandoline-Spieler hett sis erschte Konzärt i sore Beiz gäh, sehr sehr schön gsi! Es si verschiedeni Gruppene gsi, Musig und Tanz, schön, mängisch aber o chli lut und schrill, u ganz offesichtlech isch der Tanz mitem wysse Nastüechli öppis sehr wichtigs, me gustó...

Es hett es grosses Seilbähndli-Netz in La Paz, baut vore bekannte öesterrichische Firma und DAS Nahverchehrsmittel, quasi e U-Bahn ir Luft. Der Hit und i ha aui Linie mau abgfahre, das hettmi knapp vier Franke und e guete halbe Tag gchoschtet. Und es hettsech glohnt, d Stadt liegt eigentlech imne Tal-Chessel, mitde ärmer Viertel obe ufder Krete und de richere wyter unger, wos meh Suurstoff hett.

Uf verschiedene Stadt-Rundgäng hani de o chli öppis über d Politik und Gschicht mitübercho, zum Bispiel dass in Bolivie die guete Präsidente erhänkt und die schlächte wiedergwählt wärde. O zur aktuelle Lag hei d Führer, zum Teil hinger verschlossener Tür, chli verzellt, ei Errungeschaft vo hüt isch d Uhr überem Parlamänt, wie spät isch?

Was natürlech nid hett dörfe fähle isch ds wältbekannte Cholita-Wrestling. Ire schäbige Turnhalle göh die Märit-Froue ufenang los, mängisch sehr guet, mängisch sehr billig choreographiert. Ufe erscht Blick hani nume Tourischte gseh als Zueschouer, aber tatsächlech isch e ganzi Tribüne voll Iheimischi, gross u chli, jung und alt, ganzi Familie, da gsi und isch läbhäft bi däm Kampf Guet gäge Bös derbi gsi. Zu mim grosse Erstuune hett also gar nid geng Guet gwunne!

E wytere Usflug hettis vord Tor vor Stadt gführt, natürlech mit Seilbähndli und Minibus. Im Mondtal chunntmesech würklech chli vor wie ire angere Wält. Bizarri Felsformatione mit karger Vegetation sorge für eimaligi Bilder, mitem richtige Usschnitt sogar ohni Zivilisation im Hingergrund.

Das ganze toure und umstiefle isch eigentlech nume e, we o sehr spannende, Lückefüller gsi fürnes Guetwätter-Fänschter abzpasse für nomal id Bärge. Zäme mit gfüehlte zähtuusig angere Touris bine ufe Touri-Bärg Nummer Eis vo Bolivie. Wiusech das Guetwätter-Fänschter im letschte Momänt ines Schlächtwätter-Fänschter hett gwandlet, hetts zu Beginn vom Ufstieg gwitteret und när die ganz Zyt gschneit, drum heimer nie würklech Ussicht gha und isch hie o nume es symbolisches Bild vore Gletscherspalte. Immerhin bini der erscht ufem Gipfel gsi, u glich hättimer bim länge, länge Abstieg o hie eis vo dene Seilbähndli gwünscht, estaba muy cansado...

Es isch ja nid ganz ungwöhnlech, dassme seit, die wohne ir Pampa, we öpper chli abgläge und einsam wohnt. Itz chani säge, i bi dert gsi! :-) D Pampas in Bolivie isch e Teil vom Tiefland, nid Regäwald sondern meh so Steppe.

Us de Bärge kommend isches e rächte Klimaschock. Der Böss isch am Namitag losgfahre und am Morge früech vor Sunneufgang acho. I ha mini Sache zämepackt, es Jäggli agleit, bi usgstiege und ha das Jäggli grad wieder abzoge. Es isch scho denn tüppig gsi! We d Sunne hett gschunne, de ischmer unagnähm warm gsi, alles isch asträngend, fasch wie ider Höchi :-) Wes isch bewölkt gsi, isches immer no schwül-warm gsi, mängisch hetts grägnet, de isches es bitzli agnähmer worde. Das tönt itz viellech rächt negativ, i has u spannend gfunde, so ungerwägs zsi und i hättmi vermuetlech o glimau dra gwahnet. Eifach d Moskitos, die hättis nid brucht!

Mi geit dert häre für gah Tier zluege und das heimer de o gmacht. Am Fluss entlang hetts vorallem Alligatore, i aune Forme, Farbe und Grössine, würklech, die si überall! Weme ir Nacht mitder Taschelampe em Ufer nah zündet, de lüchte überall ihri Ouge, faszinierend. Düre Tag sisi sehr lethargisch, ir Nacht oder am Morge früech dütlech agressiver.

Mängisch finge d Tier o eim, mini Zimmergspändli hei e verschlossnigi Packig Erdnüssli ufem Bett gha, keni zwo Minute, nachdämer usem Zimmer use si gsi, hettsech d Camp-Affebande scho druf gstürtzt gha, es Feschtässe. D Köchin isch auso o immer dermit beschäftiget gsi, d Affe dervo abzhalte id Chuchi zcho... Derbi wäres ja eigentlech härzigi Tierli.

Und für ds einte zNacht simer säuber zueständig gsi, es hett früsch gfischte Piranha gäh. Öppe für die halbi Usbütti, wome da gseht, isch der Führer verantwortlech gsi, bi ihm hett das so locker-flockig usgseh, während mir angere dene Viecher vermuetlech ähnlech viel Köder-Fleisch hei gfuetteret, wiemer hei Fische usezoge.

O wemer würklech wyt ab vom Schuss si gsi, hetts doch hinger jeder Flusskurve nomau es angers Camp gha, abgläge und einsam, en realidad no...

Es isch wichtig, dassme der Name vom höchschte, kommerziell befahrnige See am Schluss "-kaka" und nid "-caca" usspricht, um irgendwelchi fäkalischi Verwächslige zvermiede. Der Füehrer, wo mit üs isch ungerwägs gsi, hett da sehr viel Wärt druf gleit und hett der Name de o immer entsprächend betont.

Im und ume See läbe sit längerem verschiedeni Völker. Eis dervo machtsech sini Wohn-Insle sogar grad sälber. Ursprünglech vermuetlech zum Schutz vor Feinde und Hochwasser isch das hüt e üsserscht touristischi Aglägeheit. Was d Insle sälber nid weniger beidruckend macht. Ei Meter Schilfwurzle und zwe Meter gschichtets Schilf bilde d Grundlag. Überhoupt isch ds Schilf sehr wichtig, zum Insle, Hüser und Boot boue, zum choche und sogar zum ässe, es isch rächt faserig und schmöckt nach nid viel.

Angeri Insle hei angeri Völker, die einte si bekannt für ihri Manne, wo lisme, angeri läbe ufder heiligi Insle vode Incas, der Sunne-Insle. Landschaftlech isches wunderschön. Solang d Sunne würklech o schiint, chönntme meine, die eher kargi Gägend und ds tiefblaue Wasser sigi irgendwo ar Mittelmeerküschte. Allerdings isches eher chüehl, das Wasser nid würklech uf Badetemperatur und winde tuets halt immer chli.

Zwöi Länder tüesech der See teile und i muess säge, wasd Dramaturgie vomne Gränzübertritt ageit, heisi öppis druffe:-) Mir hei üse Usreisestämpel abgholt, när üses Gepäck gnoh und si ds Fuess das Hügeli zdüruf und dür das Tor. Das macht Idruck! Uf der angere Site hei när d Ireiseformalitäte und der nächscht Böss gwartet. Und das aues isch ersch no sehr zügig gange!

Trotz der Sunne-Insle chas o mängisch stürme. Uf der guet stündige Rückfahrt im chline Böötli isch rings um üs es Unwätter ufzoge, mit Blitz und Donner. Zersch no wyt wäg, isches rasch nöcher cho und was wienes spannends Naturspektakel hett agfange isch scho fasch chli bedrohlech worde. Mir si aber no troche und wohlbehalte zrügg i Hafe cho, mit blibende Idrück vom de Naturgwalte usglieferet si, bsunders ufem Wasser... So isches uf jedefall es "-kaka"-Erläbnis gsi und nid es angers, maravilloso!