Nelspruit - Setting off to Kruger

Dene, wo scho mau mit mir si ungerwägs gsi, isch viellech ufgfalle, dass ig normalerwis nid dä bi, wo der chlinscht Rucksack hett und am wenigschte Plunder derbi hett... Es isch o nid so, dass ig das nid wüsst, so würklech i Griff übercho hanis i dene Jahr aber o nid.

Item, es ischmer rächt guet glunge, mis Gepäck ziemlech innerhalb vode Gwichtsvorgabe vor Fluggsellschaft zbhaute, woni uf Südafrika bi gfloge. U de hani itz e Inlandflug gha und plötzlech sött mini Täsche auso drü Kilo liechter si, wie steue die sich das eigentlech vor???:-) Natürlech hani nid oscho zÄsse igchouft gha, woni eigentlech ono gärn hätt mitgnoh...

Das isch das härzige Flugi, womi vord Tor vom Kruger National Park hett bracht.

Tatsächlech hanis de innert Minute gschafft, drü vo dene vier Kilo Übergwicht im Handgepäcksrucksack ds verstoue und d Dame am Schalter isch de när ono grosszügig gsi. Dass mis Handgepäck ja de im gliche Flüger isch, hani nid wöue erwähne, süsch wärsi plötzlech no ufd Idee cho, das ono zwäge und hätt de gmerkt, dasses meh aus dopplet so schwär isch, wies dörft si.

Itz bini also in Nelspruit. Mis Hostel isch auso hie ir gröschte Stadt wyt ume, u glich isch der Krach vode Vögel ringsum viiiel lüter ausd Strass, mi ghört chum es Outo!

Hie bini füre Momänt ungerbracht, eifach dasses Stacheldraht drum um hett, trüebt ds Bild es Bitzli.

Einisch meh, hani e Ort gfunge, womer sehr gfallt. Der ganz Tag louft e Fernsehsänder mitde Popschnulzene usde 90er, da chöme also o immer wieder Schuelskilager-Erinnerige uf, äbe, es schöns Plätzli:-)

Morn morge startet mini Tour i Park, i bi sehr gspannt und hoffe natürlech scho chli, dassi es paar Tier wirde gseh:-)

Und ja, i weiss, i darf ke Löi mit hei näh, mi Täsche isch itz scho zschwär!