Los Volcanes

Mir si ine anderi Wält abtoucht. Nachdäm ig mi doch scho rächt ad Bärge gwahnet ha gha, isch d Reis richtig Unterland gange, und äbe, Unterland heisst hie ganz e anderi Wält.

Agfange hetts hie in Quito, mitem sehr bekannte Hügel Panecillo. Hie us sicherer Entfernig, es wird vo aune Site abgrate, ufe zloufe, heimer de o nid gmacht... D Stadt isch riesig, der Böss, wonis hett i Süde bracht isch am Morge am siebni abgfahre, das hett grad chli zorganisere gäh, isch doch ds Terminal nid grad im Zentrum. Nume für när feschtzstelle, dassmer zwo Stund Stadtoutobahn und Tank-Stopp später fasch wieder näbem Hotel si verbigfahre...

O verbigfahre simer a diverse Vulkän, hie der Cotopaxi, eine vode bekanntischte und beliebtischte bide Bärg-Tourischte. Es heig auso würklech Schnee und Gletschter dert obe uf fasch 6000 Meter. Es isch de ufder Passstrass wyter zLoch ab gange, der Höhemässer isch i ungwahnti Tiefine gheit und d Landschaft isch grüener und üppiger worde.

U de hetts agfange, einisch umstiege später, bim Warte uf ds Kanu, bi Temperature über 30° und gfüehlte 93% Luftfüechtigkeit hetts plötzlech graschlet ide Böim und die erschti Affebande hettis begrüesst. Willkomme im Rägewald.

Ds Wasser vom Fluss isch nach wie vor nid so klar, aber d Lag vo üser Unterkunft isch u schön, mit Abesunne über Fluss, zmittst im Grüene und mitme fürchterleche Lärm, vorallem ir Nacht, derfür schöneme Stärnehimmel, weme es Loch im Blätterdach fingt :-) Voilà, el otro mundo...