Kruger National Park

Im und ume Kruger National Park isch eis Thema rächt dominant, die Big 5. Früecher die füf am gfährlechschte Tier für z Fuess zjage, isches hüt vor allem Marketing. Da sie sowieso scho viel mediali Ufmerksamkeit überchöme, wirdi i däm Post nid würklech druf igah (das gilt nid fürd Geparde im Titelbild, die ghöre dert nid derzue;-!!))

Ja, mir heise aui gseh und gfötelet, es si spannendi Gschichte derhinger, wos o um Läbe u Tod geit, wär meh möcht wüsse, müesstmi haut säuber frage...

Stattdesse wirdi e chline Antilope-Wettbewärb mache. Vo dene Dinger hetts ungloublech viel und ide verschiedenschte Variante. I zeigenech hie vier Bilder, wär zGfüehl hett, är/sie wüssi bi eire, was das für eini isch, söll doch e Kommentar schribe:-)

Nummer 1 isch der McDonalds vom Busch (warum?) ...

... Nummer 2 isch für mis Nerd-Härz ...

... Nummer 3 hani scho gässe (oder zmingscht e Teil dervo) ...

... und Nummer 4 ghört zude chlinschte Arte, sie si würklech chlin!

Wär weiss was?

Ufde Bilder im Hingergrund gsehter o, dass d Landschafte sehr, sehr ungerschiedlech si! Das und, wie söui säge, d Gsamtheit vode Tier isch für mi zidrücklechschte gsi. Mir si wie richtigi Tourischte im offene Fahrzüg ume gfahre und si so eifach zmitts im Drama gsi. Zum Teil heisech d Tier gar nid würklech lah störe oder hei eifach stöber gluegt, es isch es sehr speziells und o schöns Erläbnis! Mir hei o e super Guide gha, wonis henne viel Hindergrundinfos hett gäh. Schad kennimi mit Vögel nid so us, da heimer so viel 'exotischi' gseh und i hamer scho nid mau d Näme chönne merke...

Heiter übrigens gwüsst, dasses näbde grosse o die chline und die wüeschte Füf git? Ig o nid...:-)