I bi ziemlech sicher, der eint oder die angeri vo euch bringt Südafrika vermuetlech vor allem mit feinem Wy i Verbindig. Grüchtewis hani oscho ghört vo däm, am Wucheänd isch ds Ziel gsi, däm chli ufe Grund zga...
Ir nöchere Umgäbig vo Cape Town heigs Hunderti vo Wy-Güeter, das isch dütlech meh ausme realistischerwis imne Tag cha aluege:-) So heimer üs ufne Uswahl beschränkt.
Das ganze isch ziemlech uf üs Turischte usgleit, ds Degustiere isch seehr günschtig und umfasst füf bis sächs verschiedeni Wyye. Zum Teil isches es empfohlnigs Programm gsi, zum Teil heimer sälber chönne useläse. I has eifacher und o sinnvoller gfunge, uf die zlose, wo drus chöme, mir hei ganz gueti 'Guides' gha, wo o viel und interessants hei verzellt.
Ufem einte grössere Wy-Guet heimer o e Füehrig gmacht und die riiesige Chäller und o süschtige Alage gseh, idrücklech! Sie hei o der alt Chäller no gha, wosie früecher hei agfange Wy mache, hüt isch das nume no Deko, wen o sehr schöni Deko:-)
Und klar, es hett ganz gueti Tröpfe drunger gha:-) Mini Gwichtsproblem, Dir erinnertnech, verhindere aber, viellech zum Glück, dassi gross i Wy-Handel chönnt istiege. D Entdeckige vom Tag si e Hammer-Brandy, mit Kaffi- und Schoggi-Gschmack sowie dass weme vorem Iiswy es Stück salzigs Caramel isst, der Wy nomal viel besser wird...
Mi cha bim Wy-Degustiere o übertriebe, i meine itz nid Alkoholmässig, das sicher o... Ufem Heiwäg hani de scho der Idruck gha, mir heige itz gnue Wyye probiert, no meh wär schad gsi. Zum Glück heimer e Uswahl troffe...