Hiking Days

I bi ja eigentlech der Meinig gsi, der Umgang mitere Landcharte sig itz nid öppis, woni henne schlächt chön:-) U glich, jedes Mal, weni mau wieder e angeri, frömdi Charte ir Hang ha, geits es Zytli, bisi chli warm wirde dermit!

Geschter und hüt isch wandere ufem Programm gstande, zersch hanis mau säuber probiert und de äbe gmerkt, dass die Plän hie haut nid usgseh, aus wäresi vor Swisstopo... OK, d Charte isch kopiert, überchläbt und bemale gsi, das hetts viellech ono chli erschwärt.

Im Vordergrund si Steimandli, wome überall gseht, mängisch dienesi als Wägwiser, mängisch nid. Im Mittelgrund links isch der Ndlovini Mountain, mis erschte Ziel. Im Hingergrund Mitti isch der Giant's Cup, die beide Spitze links und rächts si über 3250m höch, der lingg isch ds Ziel vo hüt gsi. Und das wo im Hingergrund rächts e chli usgseht wie die Siebe Hängschte si tatsächlech die Zwölf Apostle.

I has u gnosse und grad o gmerkt, dass sowohl alei wie o ir Gruppe ungerwägs zsi beides vieli Vorteile hett, umso schöner, weme beides cha kombiniere!

Geschter isch e schöne Tag gsi, liecht bewölkt, aber o immer wieder sunnig. Ufem Bild ir Mitti i däm Wäldli isch mini Lodge, vieli chlini Gebäude, u schön ibettet, es gfalltmer sehr! Es isch bis wyt über 3000m Grasland und mi cha rächt guet eifach so ufe wandere.

Allerdings cha o hie der Näbel es Problem si. Hüt isch meh oder weniger der ganz Tag so gsi und mir hei nid henne viel gseh. Mir heinis sogar, trotz Guide(!), verloffe:-) O we d Sicht rund 100m isch gsi, ufme Hochplateau isch das haut längschtens nid gnue. Mir heinis de ufne Marschtaktik mit Uffanglinie geiniget, si de aber sogar no vomne Basotho-Schäfer, das isch dä ir traditionelle Wulldechi, zrügg ufe Pass gführt worde. Am Guide isches ungloublech piinlech gsi und i verstahne es Bitzli:-)

Tja, o weme ad Landcharte gwahnet isch, sogar iheimisch isch, passiere cha eim das glich! Bini doch chli beruehiget.