Exploring Downtown and More

Das Wucheänd isch ganz im Zeiche vor Stadt gstande. Da hüt Freedom Day isch gsi, heimer frei gha. Das isch der Fiirtag zur Erinnerig a die erschte freie Wahle nach der Apartheid 1994.

I ha die Glägeheit gnützt, e chli meh vo Kapstadt zgseh. Am Samschtig Abe bini zum zNacht ar Waterfront iglade gsi. Mir hei ganz guet gässe und derbi ono grad das Tourischteviertel erläbt.

Geschter hani när wieder mau definitiv eine uf Tourischt gmacht, ha usegfunge wieme ohni Billie Zug fahrt und bi ufe Signal Hill gloffe. Vo dert hani e guet Überblick vo Kapstadt Downtown übercho und das hett mim Orientierigssinn ganz guet ta, i bi nämlech ohni Charte ungerwägs gsi (dir erinneretnech...?)

Da hettme zum Bispiel der Lion's Head gseh, rächts vorem Table Mountain. Das isch der morgentlech Jogging-Bärg vode Capetownians, völlig überloffe bi Vollmond, seitme...

Oder de o Robben Island, schwach erkennbar, die berüehmt-berüchtigti Gfängisinsle. Uf Signal Hill hetts es Kunschtwärch, wo usem Stacheldraht vo Robben Island isch gmacht worde. I finge, das verbrönnte Gebüsch im Vordergrund passt sehr guet zu mine Assoziatione vo Robben Island.

Dank mim so gwunnene Überblick hani de när o der Usflug dürd Innestadt guet überstande, eifach am Schluss der Bahnhof wiederzfinde isch nomau grad chli spannend worde. Vo da gits keni Föteli, i finge, es isch e normali Küschtestadt, die gseh ja eh die meischte öppe glich us;-)

I loufe gärn i frömde Städt, o wesmer der eint oder anger schräg Blick vo mine Mitmönsche itreit, so im Sinn vo 'Da chunntme doch niene häre' und 'Du bisch doch verruckt'. I finge, i lehri so e neue Ort besser kenne und es fägt.

Hüt bini de mit mine Chefs nomal ufe Table Mountain, dasmau vore angere Site und ine angere Egge.

Es hett obedruffe rächt viel Stoudämm, mir Schwyzer kenne das ja chli, es isch eifach im erschte Momänt ungwahnet, dass d Stousee ufem Bärg obe si und nid ide Täler...

Einisch meh isches auso e super Tag gsi, i mine zwo Wuche Kapstad isches bis itz zwe Täg bewölkt gsi, einisch hetts grägnet und süsch isches eifach gsi. Es isch eifach schön wenns schön isch.

Und viellech ischnech o ufgfalle, dassi zwar tatsächlech meh vor Stadt ha gseh, dass das aber meischtens vomne Bärg us isch gsi. Voilà:-)