Ok, Strand isch viellech chli ungertribe, isch doch das immerno Wüeschti. Allerdings e sehr farbigi Wüeschti, wius mau Meeresgrund sigi gsi, isch der Bode sehr riich a Mineralie und das füehrt zu ganz ungerschiedlech Gälb- mängisch sogar Rottön vom Sand. U zwüschihne glitzerts ufder Strass und de si das richtigi Salzkristalle!
Uf jedefall hani chönne e Velotour mache, mis Miet-Bike hett gschlotteret und klappert uf dene unruehige Strasse und i bi auso scho chli froh gsi, wos ganz wieder im Städtli isch gsi. Mi cha dürnes Naturschutzgebiet fahre und hett a verschiedene Pünkt schöni Ussichte uf Stränd und Klippe und cha sogar es bitzli näbe usse, das machts fürds Velo natürlech nid eifacher...
Es paar Kilometer vorder Küschte hetts es paar ganz chliini Inseli mit Millione vo Vögel druffe. Natürlech schiise die Viecher o und das schmöcktme rächt guet. Interessanterwiis isch dä Vogelschiisdräck e sehr e guete Dünger, so guet, dasser regelmässig gsammlet wird, es töni nid nume wie, sondern sigi auso o e Schiis-Job... Vor es paarne Jahr isch dä Dünger sogar Peru's Export-Schlager gsi!
Zrügg am Strand hanimi de nomau a öppis Neus gwagt und ha es paar Kiteboarding-Lektione gno. Zum Teil isch das mit sehr viel Wasser schlücke verbunde gsi, i bi üsserscht fsziniert, wie dass der Kite mitem Wind zämespielt und wie dassme das cha (i mim Fall versueche) beiflusse, sehr spannend! Immer wieder isch das Ding de haut schono meh oder weniger kontrolliert im Wasser glandet, aber es ischmer doch o glunge, mi uf das Brätt lah z zieh, u das fägt de sehr!
Ihre Teil zur Farbevielfalt hett natürlech o d Sunne bitrage. Am Vormittag isches immer bedeckt und grau gsi, ume Mittag hetts uf blau gwächslet und am Abe isches mitme spektakuläre Untergang wieder schwarz worde, que hermoso!