El Mercado de Otavalo

Ok, iverstande, die meischte Lüt chöme wägem Märti uf Otavalo... Der Märit isch o der Grund, warum dassi vo Otavalo ha ghört und i bi auso o ufem Märit gsi! Aaaber fasch chli meh atah hettsmer, was rings um das doch rächt härzige Städtli isch ...

Jawohl, es hett nämlech e neue Höherekord gäh;-) Das isch u praktisch hie, mi cha de 4000er aus Vormittagsspaziergang mache, isch am Mittag zrügg und hett no der ganz Nami Zyt für, zum Bispiel, ufe Märit. Otavalo liegt o ar Allee vode Vulkän, bi einige hetts Krater-Seee gäh und zwe dervo bini geschter u hüt gah bsueche. Und weni säge Spaziergang, de isch das nid mau gross übertribe, zum Teil isches auso scho fasch Chinderwage-touglech!

Die Laguna dahie hett zwöi chliini Inseli, wunderbar blaus Wasser und ume ganz Kraterrand geit e Wäg, sehr schön! Nume... die Inseli gseh fasch chli so us, wie üsi erschte Versüech mitem Terragen-Progrämmli, nid? Chli zu rund, chli zu künschtlech, aber sie si ächt:-)

Ds zwöite Ziel isch de chli aspruchsvoller und äbe o chli höcher gsi. Das Mau isches vor Laguna wäg uf zwöi Güpfi näbedranne gange. Es hett o hie e guet sichtbari Wägspur dürds Grasland, ds Páramo, zum Glück, i ha zwöi-, drümal usprobiert, wies näbem Wäg zum loufe geit und das isch auso üsserscht müehsam. Item, mi cha die beide Gipfle überschritte, mit liechter Grat- und Plattechlätterei derzwüsche, uuuhh, hanis gnosse!:-)

Und de der Rückwäg natürlech, im Taxi ufere uralte, löchrige Chopfsteipflaschterstrass. Wie gseit, es längt no guet für übere Märit und i bi itz aus o stolze Bsitzer vomne mit schlächtem Gwüsse abeghandlete Poncho, ¡que bonito!