Der Chimborazo isch der höchscht Bärg vo Ecuador, und wägder Form vor Ärde, wo am Äquator dütlech dicker isch als ade Pole isch der Gipfel vom Chimborazo dä Punkt, wo am wytischte Wäg isch vom Ärdmittelpunkt und am nöchschte bim Mond. Ds nächschte Ziel vo üs und - Spoiler Alert - es hett nid glängt...
Hie isch der Hüttezuestieg auso scho sehr gäbig, mi fahrt eifach bis ufd Höchi vom Mont Blanc mitem Outo ufe und voilà, isch ir Hütte. Das füehrt natürlech o derzue, dasses sehr viel Tagesgäscht hett, aber am Abe wirds de gli mau ruehiger.
So ruehig, dass sogar der Andewolf, Lobo Andino, zur Hütte chunnt cho luege, öbs äch Räschte für ihn gäbi...
Nach Sunneuntergang geitme ga schlafe, aber de hörts de scho grad mitde Gmeinsamkeite zu schwyzer Bärgtoure uf. Es füehltsech üsserscht komisch a, am 10i scho wieder ufzstah und zMorge zässe:-) Am 11i simer los gloffe und die sehr, sehr stotzige Häng in Schnee und Iis hei so fescht ihre Tribut gforderet, i dere Höchi ischmer buechstäblech jede Schritt schwär gfalle, dass der Bärgfüehrer irgendwenn hett entschiede, dassmer umchehre. Was blibt positivs? Mir si ganz und gsung wieder abecho, und es isch e wahnsinnig schöni Nacht gsi, mitme wunderbare Monduntergang und vielne, vielne Stärne inklusive einige Stärnschnuppe. Wiui vor allem mit Schnufe bi beschäftiget gsi, hani keni Bilder dervo, qué lástima! :-)