Durban Downtown

Mi erscht Idruck hettsech bestätigt, i bi zmittst im Summer glandet, zmingscht i däm, wo mir Mitteleuropäer viellech aus Summer bezeichne:-) Ir Nacht bliebts über 20°C und so längt mi Sideschlafsack längschtens, oder isch ono fasch zviel... Bi strahlender Sunne hani auso chli eine uf Tourischt gmacht und bi der uuu länge u schöne Strandpromenade entlang nordwärds (insider...) spaziert.

I chanech säge, fasch wie ide Ferie:-) Mit riesige Wälle!

De hani aber de ono chli meh vor Stadt wöue gseh und ha eine vo dene usgschilderete Fuesswäge gwählt. U de bini plötzlech nüm eine vo vielne Tourischte am Strand gsi, sondern eine vo zäh Wiise i drü Stund Schwarze:-) So spannend, es hett henne viel Lüt uf dere Houptstrass gha und der Lärm isch unbeschrieblech (i probieres itz glich...). Immer isch irgendöpper am huupe ufder Strass,
die unzählige Minibössli si die ganz Zyt am pfiife und schreie, wosi häre fahre, aui si am rede u handle mit de Märitlüt, wo meischtens es Tuech a Bode hei gleit und dert ihri Ware präsentiere und e Strass züberquere isch scho fasch e Überläbenskampf, da d Fuessgänger grundsätzlech keni Rächt hei. I hami so chli lah mittriebe u ha versuecht, mim Ziel geng chli nöcher zcho. Das hett de mit es paar Umwäge, Hingerstrasse und ere Gleisüberquerig o ganz guet klappet.

So ganz näbebi bini ono am Stadthuus verbi cho.

Itz bini immer no in Durban u das isch nid wie vorgseh. I ha nämlech id Bärge wöue, ha Shuttle u Hostel buechet und hami o ziemlech gfreut. Aber der Shuttle isch eifach nid cho. So die erschte paar Stund hani no nüt böses dänkt, afrikanischi Pünklechkeit sig nid füf Minute vorder Zyt, aber de bini de scho chli rauig worde, hamer nomau es Zimmer gnoh u starte morn nomau e Versuech, I'll keep you posted...