Daily Business in Cape Town

Ja genau, es isch durchus realistisch, dassi chli usem I-läbe-usder-Koffere-Modus usechume und mi ufne längere Ufenthalt hie istelle. So ganz glunge ischmer das aber no nid und i ha gmerkt, dass das bi mir nid eifach so chunnt, sondern, dassi da e gwüsse Ufwand muess und möcht betriebe.

Nähmemer zum Bispiel d Wucheänd. Das si die Zyte, wo ganz u gar nid frömdbestimmt si. I ha letscht Sunntig gmerkt, dassi nid eifach nume wott dahei umehocke, sondern dass da e grossi, spannendi Stadt isch zum entdecke. Allerdings liegt die nid grad eifach so vorder Hustür, auso, eigentlech scho, aber die schieri Grössi und der nid so intuitiv öffentlech Verchehr hei zur Folg, dassi chli meh muess plane:-)

Natürlech bini aber nid die ganz Zyt umeghocket. Zäme mit mim Gaschtvater und emne Fründ vo ihm simer ufe Table Mountain gwanderet. Das isch super gsi, es isch e sehr klare Tag gsi und vo obe heimer wyt ume gseh, so hett die ganzi Stadt ono mau chli Gstalt agnoh.

Mir si vor Sunneufgang losgloffe, das hett üs nid nume e bsunderi Ussicht verschafft, sondern hett der doch rächt steil Ufstieg bi agnähm chüehle Morgetemperature guet erträglech gmacht.

Mir hei ziemlech viel länger brucht als gschätzt, so isch ds planete zMorge zumne zMittag worde, die wunderschöne botanische Gärte als Kulisse derzue heimer glich gha!

Weme so früech los louft ischme haut o früech zrügg und so hani gäbig Zyt gha, mir chli Gedanke zmache, wieni die näschte freie Täg chönnt verbringe:-)