Langsam aber sicher arbeiti mi dür mini Lischte vo Sache, wome UNBEDINGT MUESS GSEH ha in Cape Town:-) Und weni tatsächlech sone Lischte hätt, wär ds Cape of Good Hope sicher druf. Viellech heiter scho ghört, dass d Baboons dert vore uf dere Spitze ungloublech fräch sige und dasses o ungloublech viel dervo heig. Das stimmt aues nid! Mir hei nume viellech füf Stück gseh und sie si o überhoupt nid fräch sondern eifach sehr sälbschtbewusst vorder Kamera:-) Und süsch isches e touristisch sehr guet usgschlachtete Felse, der südweschtlechscht Punkt vo Südafrika, das tönt für mi chli wie der Wältrekord für die längschti Strecki brönnend vomne Ross zoge ds wärde bi Vollmond und emene Täller Spaghetti ir Hand:-) Item...
Ufem Wäg dert häre simer o bi Boulder's Beach verbi cho und hei dert die einzige freiläbende Pinguine in Afrika (ok, das tönt tatsächlech chli weniger bizarr) gseh.
No meh Pinguine hetts de im Aquarium ar Waterfront gha. Dert si die luschtige Rockhoppers gsi und die gseh mit ihrne gälbe Sträne scho chli wie Hippies us, es git doch e Surfer-Trickfilm dervo, oder? Uf jede Fall isches sehr beidruckend, wie agil die Tier unger Wasser si!
E chli wäg vor Küschte am Fuess vor nächschte Bärgchötti hetts de vo dene bekannte Räbbärge. Und die Farme, wo der Wy gchelteret wird si zum Teil u schön zwäg gmacht und usbout. Die wo mir si gsi isch über 300 jährig und hett e Gmüess-, Chrüter und Obschtgarte, womesech Namitage lang cha vertöörle drin. Witlöufig, mitere groosse Vielfalt a Pflänzli, aues tiptop grichtet und beschriftet. I hamer lah säge, dass ds Hotel, wo derzue ghört eher im obere Priissegmänt sig:-)
Und klar, Sunneungergäng gits überau ufder Wäut... I finge, zgseh, wie d Sunne imne Meer ungergeit, das MUESSME UNBEDINGT MAU:-)