Dasmau isch d Reis südwärts gange, wyt wyt südwärts... Nachder Sierra, em Oriente hettmer no der dritt Teil vor Landschaft gfählt, d Costa. Es isch e länge Wäg mit einige Überraschige gsi.
O d Tierwält hett natürlech gändert und i ha scho chli müesse schmunzle, womer zmittst ir Stadt dä Drache si begägnet. Die Iguanas si i däm chline Pärkli völlig frei, chlättere ufd Böim, sünnele ufder Hecke, kraxle überenang übere, und wärde regelmässig mit es paar Blätter gfuetteret.
Süsch si die erschte zwo Statione eher so gsi, vom härzige Bärgstädli isches i die gröschti Stadt vo Ecuador und vo dert überd Gränze id Houptstadt vo Peru gange. Wassech hie imne Näbesatz laht lah zämefasse ische e 1'500km Böss-Fahrt über 30 Stund gsi :-) E nid unwäsentleche Teil dervo simer am Gränzübergang umeghanget. Es isch eigentlech ke schlächti Idee, dasssi d E- und d Imigration ir gliche Alag hei zämegfasst, allerdings isch, zmingscht mir, lang nid klar gsi, wenn dassme itz wohäre hätt söue für wele Stämpel im Pass. Item, nach rund zwo Stund bini zrügg bim Böss gsi, es hett de glimau gheisse aues istiege, aber bismer de würklech si losgfahre isches nomau zwo Stund gange... nume für zwo Fahrstund später nomau uszstiege und der Pass nomau lah zkontrolliere:-)
E Böss später, inmitte vomne Huufe angerne Tourischte, hetts de verschiedeni Stopps gäh, womer unger angerem e ehemaligi Boumwulle- und Zuckerrohr-Plantage hei chönne aluege, wones beidruckends Tunnel-Labyrinth hett gha. Derzue heimer einiges überd Gschicht vo dere Gägend und de Lüt glehrt und das hani sehr cool gfunde.
I ha ja scho im Reisefüehrer gläse, dass der Küschteabschnitt eher karg isch, aber e veritabli Wüeschti hani irgendwie glich nid erwartet. We der Böss aube so ines Dorf isch gfahre, de hätt das genauso guet im Mittlere Oschte oder in Nordafrika chönne si, und ds Meer ufder rächte Site hett der Kontrascht de perfekt gmacht. Wyt, wyt im Süde ir Sand(strand)-Wüeschti hei auso die nächschte paar Ferietäg agfange, que se divierta!